தற்காலிகங்கள்.
நீங்களாகவே இருந்து கொள்ளுங்கள்
வானத்துக்கு ஏணி கட்ட
உங்களால் முடியவே முடியாது
ஏனென்றால்
இலகு வியாபாரிகள் நீங்கள்
ஒரு மரம் நட்டு
நீரூற்ற முடியாதவர்கள்
ஏனென்றால்
பிறர்நலன் சிந்திக்க நேரமற்ற
உழைப்பாளிகள் நீங்கள்
ஒரு நேரம் ஒரு வேலை
முடிக்க முடியா வீரர்க்ள் நீங்கள்
ஏனென்றால்
திட்டமிடல்
உங்களைத் திட்டித் தீர்க்கிறது.
நீங்கள் நிற்குமிடம்
குழிந்து கொண்டே இருக்கின்றது
சீரின்றி.
படிகளின் உச்சத்தில்
சிம்மாசனமிட்டிருக்கும் வேந்தர்களாய்
எக்களிப்பில் நீங்கள்
செங்கோலின் நிரந்தர கற்பனையுடன்.
தற்காலிக சுகங்கள்
தரை தட்டிப் போகும் ஒருநாள்
அதுவரை
நீங்களும் உங்கள் குழந்தைகளும்
அனுபவித்துப் போங்கள்
கேள்விகளுள் அடங்காத
விதிவிலக்குகளின் பெயர்களால்.
வி. அல்விற்.
02.01.2015.
கருத்துகள் இல்லை:
கருத்துரையிடுக