வெற்றஞ்சல்.
சேர்த்து வைத்திருக்கிறேன்
சொற்புணர்ச்சிகளையும்
சொற்பிரிப்புக்களையும்
முன்னாலே பரத்தி வைத்தபடி
காலம் பார்த்து
ஒழுங்கமைத்துவிட.
அடிக்கடி வழுகி விழும்
ஈரம் காய்ந்த
நிழல் நாட்களை
அள்ளிப் போட வேண்டியிருக்கிறது
பெரும் பிரயத்தனத்துடன்.
உச்சி முகர்ந்த அம்மாவின்
கடைசி முத்தத்தையும்
கனவுகளில் தொலைந்து போகும்
தெருக்களையும்
தூக்கம் கலைத்து
அடிக்கடி பேசிப் போகும்
இல்லா உறவுகளையும்
உணர்வறுந்த உறவுகளின்
பிறழ் நிலையையும்
வழியெங்கும் புல் விதைக்கும்
பேதமைகளையும்
வரம் வாங்கி வந்த
வாழ்வு தரும் அபத்தங்களையும்
உயிர்ப்பாக வரைந்து
கைகளில் சேர்த்து விட
கையெழுத்திட்ட
வெற்றஞ்சலை வைத்துக்
காத்திருக்கிறேன்
வி. அல்விற்.
06.05.2015.
கருத்துகள் இல்லை:
கருத்துரையிடுக