படலையும் பூட்டும்

படலையும் பூட்டும் 

இரவுகளில் மட்டுமே பூட்டப்படும்
என் வீட்டுப் படலை
திறந்தே இருந்தது 
என் உறவினரின் வருகைக்காக
எந்நேரமும் பகலில்

நான் வளர்த்த சேவலும் கோழிகளும்
என் கையிலிருந்த

அரிசிக் குருனலுடன் 

என் உள்ளங்கைகளையும் 

சேர்த்துக் கொத்தி விட்டு 

பூவரச மரத்திலேறி
நித்திரை கொண்டு விட்டுக்
காலையில் தவறாது
துயிலெழுப்பி 

சத்துணவையும் 
கையில் தந்திருந்தன

நான் பால் கறந்த ஆடுகளும்
கோடிப்புறத்திலிருந்து
முற்றத்தால் மேய்ச்சலுக்கு ஓடுகையில்
என் அழகுக் குரோட்டன் செடிகளை
முன்னுணவாக கடித்து
என் திட்டுக்களுக்குப் பயந்து
பின்னங்கால்களால் உதைத்து
முன்னங்கால்களால் தாவி
பாயும் அந்த முன் வழி
அதற்கு பழக்கப்பட்டதொன்றான
காலத்தில்,

வேலிகளைப் பிய்த்துப் போட்டு
பாதை தவறி மிதித்து வந்தன
ஓநாய்க் கூட்டங்கள்
மூச்சிரைத்து ஓடினவே தவிர
என் வீட்டுப் படலையை
கண்டு கொள்ள முடியவே இல்லை
அவைகளால்

மரத்திலேறிய சேவலும் கோழிகளும்  

அதன் பின்னர் இறங்கவேயில்லை 
மேய்ச்சலுக்குச் சென்ற ஆடுகளும்
இன்னும் திரும்பவேயில்லை
என்னைப் போலவே

என் வீட்டுப் படலைப் பூட்டு
கறள் பிடித்திருக்கும் இப்போது
திறப்புடன் யாராவது வருவார்களா
என்றும் காத்திருக்கும்

திறந்திருக்கும் பகற்பொழுதுகளில்
உறவினர்களை வரவேற்க.

வி. அல்விற்.
17.10.2014.