பேசாப் பொருள்
கருமேகங்களுள் மறைந்திருக்கும்
நீர்த்திவலைகள் போல
குளிர்விக்கும் இளமையில்
உன்னை அறியாத காலமொன்று
அவனுக்குள் கடந்து விட்டிருக்கிறது
பேசப்படு பொருள்கள் மூடப்பட்டு
பதில் கிடையாத முடிவுடன்
மௌன அறைக்குள் சேமித்து வைக்கப்பட்டுள்ளன
சொல்ல முடியாத காதல் போல
பாதுகாப்பும் பிரமாண்டங்களும்
மென் காற்றில் தகர்க்கப்பட
போடப்பட்ட சுயவேலிக்குள்
அவன் முடங்கிக் கொள்ளுகையில்
நீ சட்டங்கள் படித்துக் கொண்டிருந்தாய்
இயலுமைகளும் இயலாமைகளும்
தெரிவின்றி நெட்டித் தள்ளிவிட
வாழ்க்கைச் சமுத்திரத்தில்
அமிழ்ந்தெழுந்து அமிழ்ந்தெழுந்து
நீந்துவதற்குப் பழகியிருக்கிறான்
நீ பட்டம் பெற்றுத் திரும்புகையில்
அவன் கரை சேர்ந்திருக்கிறான்
இனி பேசப்படாத பொருள்கள் பேசப்படலாம்
பதில்களும் விரும்பியபடி கிடைக்கலாம்
ஆனாலும்........
அவன் உன்னை அறியக் காலம் எடுக்கலாம்.
வி.அல்விற்.
02.06.2014.
கருத்துகள் இல்லை:
கருத்துரையிடுக