எது சுதந்திரம்?
வாய்களைக் கட்டி
அங்கங்களை வெட்டியெறிந்து
நடைப்பிணங்களாக
உலாவ விட்டிருக்கும் உங்களுக்கு
எது சுதந்திரமாகத் தெரிகிறது?
பாட்டன் முப்பாட்டன்
காலத்துச் சொந்த நிலங்களை
பறித்தெடுத்துக்கொண்டு நம்மை
அலைய விடும் உங்களுக்கு
எது சுதந்திரமாகத் தெரிகிறது?
எமது சுதந்திரங்களை
நீங்களே வரையறுத்துக் கொள்ளுகிறீர்கள்
எமது இருப்புக்களையும்
நீங்களே தீர்மானித்துக் கொள்ளுகிறீர்கள்
பேசவும் அருகதையற்றவர்களே!
உங்களது அம்மணங்களே
உங்களது சுதந்திரமாக இருக்கிறது என்பதைப்
பறையறிவித்துக் கொள்ளுங்கள்!
அதுவே மிகப்பொருத்தமாயிருக்கும்.
வி. அல்விற்.
04.02.2017.
கருத்துகள் இல்லை:
கருத்துரையிடுக