ஒரு கோப்பை தேநீர்.
இப்பனிக்கால உறைதல் போல
நீங்களும் உறைந்திருக்கிறீர்கள்
என்னுடனான முரணுறுதலிலிருந்து
இளகிவிட மறுக்கும் மனதுடன்.
எங்கிருந்து இவ்விதைகள்
முளைவிடத் தொடங்குகின்றன?
பொறாமையுள் வீழ்ந்து
போட்டியில் வெடித்து
சுயநலத்தில் மேலெழுந்து
சகிப்புகளை அமுக்கி
நானாகி வேரோடி
திமிர்த்தெழுந்து நிற்கின்றோம்.
ஓ!
முரணுற்று மறுதலிப்பவர்களே!
உண்மைகளை ஏற்பதிலுள்ள
உங்களிறுக்கம் தளரும்படிக்கு
ஒருகோப்பை தேநீர் உதவுமாயின்....
வாருங்கள்!
மிதமான இக்குளிரில் இதமான சூட்டுடன்
ஒருகோப்பை தேநீர் பருகலாம்
மெல்லப் பேசிக்கொண்டே.
வி. அல்விற்.
02.01.2017.
கருத்துகள் இல்லை:
கருத்துரையிடுக