ஓ! என் பிரிய சிசுவே!
சேமித்து வைக்கப்பட்ட
நினைவுக் களஞ்சியம்
இதோ
தன் வாயகலத்
திறந்து கொள்ளுகிறது.
கீழே குதிக்கின்றன
புயல்காற்றின்
பயங்கர ஓசையுடன்,
பாம்பாய் நெளிந்தும்
பூச்சிகளாய் ஊர்ந்தும்
பூதங்களாய் நெருங்கியும்
பாதாளக் கிணற்றுள் வீழ்த்தியும்
ஓடமுயன்ற கால்களைக்
கட்டிப் போட்டும்
கனவுகளாய் வந்தென்னை
ஆட்டி வைக்கின்றன.
ஓ! என் பிரிய சிசுவே!
என் கனவுகளை
உன்னால் பிரித்தறிய முடியுமா?
அல்லது மொழிபெயர்க்கத்தான்
முடியுமா?
பேய்களாய்க் காதிலிரையும்
இந்தச் சத்தங்களை
உன் அணைப்பால்
நிறுத்திவிட முடியுமா?
ஓ! என் பிரிய சிசுவே!
உனது நிமித்தம்
எனது ஆயுளை நீட்டுவிக்க முயல்கின்றேன்.
என்னை நெருக்கியிரு!
உண்மையாகவே என்னை
ஆட்கொண்டிருக்கிறது
இந்தப் பயம் என்பதை
எனது மௌனத்திலிருந்து
மொழிபெயர்த்துக்கொள்!
ஆனால் இவையேதும்
உன்னை அண்ட விடாமல்
எனதுயிர் உன்னோடிருக்கும்.
வி. அல்விற்.
02.10.2015.
கருத்துகள் இல்லை:
கருத்துரையிடுக