விரும்புகின்றேன்.
நான் சத்தமிட்டுச் சொல்ல விரும்புகிறேன்
இந்த மழையில் ஊறி
தன் பிடி தளர்த்தி
காற்றிலே அலையுண்டு
நிலத்திலே வீழும்
இந்தப் பசுமையிழந்த இலைகளுக்கு
நான் அவற்றை விரும்புவதாக
குளிர் வந்தேறி
கால்களுள் உறைந்து கொள்ளும்
இப்பனிப் பிரதேசம்
இன்னும் என்னை மூடிக் கொள்ளவில்லை
என் மூச்சுக் காற்றின் வேகத்தோடு
இரைந்து சொல்லுகின்றேன்
நான் இவ்வாழ்க்கையை
மிகவும் விரும்புவதாக
பேச அமராத இருக்கைகள்
ஏமாற்றத்துடன் வீற்றிருக்கின்றன
உடைபடாத வார்த்தைகள்
கற்பனை உருக்கொண்டு நடமாடுகின்றன
இன்னும் அதிகமாக விரும்புகின்றேன்
காற்று சுமந்து கொண்டுவந்து
உதறிவிட்டுப் போன
இந்த வாழ்க்கையை.
வி. அல்விற்.
23.09.2015.
கருத்துகள் இல்லை:
கருத்துரையிடுக